الموبقات وعلاقتها بالهم

المقال عبارة عن حوار افتراضي باللهجة الجزائرية لكن المعلومات المذكورة فيه واقعية

#المقال

قالو: علاه تتكيف وتدروقي وتسكر ؟

ردلو: باه ننسى هم الفقر والميزيرية، خير مما نسرق

قالو: قداه تتكيف من ڨارو في النهار ؟

ردلو: 2 باكيات دخان.

قالو: بقداه الباكي ؟

ردلو: 30 ألف سنتيم

قالو: وقداه من جوانة زط.لة تلهوثها في اليوم ؟

ردلو: حوالي 2 جوانات تاع 50 ألف للوحدة.

قالو: قداه من إيريكا تضرب في اليوم ؟

ردلو: كانت ب 70 ألف كنت نضرب وحدة وولات ب 35 ألف وليت نضرب 2.

قالو: قداه من خط كوك.ايين تضرب ؟

ردلو: الكو.كايين خاطيني، غالي بزاف، الخط ب 800 ألف والغرام الواحد ب 2 ملاين و 200 ألف.

قالو: بقداه تشرب الشراب (الخمر) في اليوم ؟

ردلو: ما نفوتش 200 ألف لليوم كاين الغالي وكاين الرخيص فعلى حسب الكمية والنوعية.

قالو: زيد وش تدير باه تنحي الدمار تاع الفقر؟

ردلو: الشمّة، وتدعى بالنفّة،

قالو: الدخان 2 باكيات في اليوم تخرجلك مليون و800 ألف للشهر، والز.طلة تخرجلك 3 ملاين للشهر، والإيريكا 2 ملاين و100 ألف للشهر، والشراب (الخمر) 6 ملاين للشهر، والشمة ديرلها آبوبري 600 ألف للشهر والمجموع 13 مليون و500 ألف،.

ردلو: هكاك ساعات تكون الدعوة مرفهة تفوت وساعات تكون قل شوي.

قالو: المشكل مش لثم، المشكل أنك باه تنسى الفقر وما تروحش للسرقة تحب تلهي عقلك وتستهلك الحوايج هذو بقيمة 13.5 مليون سنتيم كل شهر، لكن السؤال: منين تجب الصوارد هذو لي تشري بيهم هاذ الفكاير لي تنسى بيهم الفقر ؟

ردلو: باينة باه نجيبهم لازم نسرق

كتبه #صهيب_بوزيدي