«خلي ربيع المدخلي ينفعك»

تصنيف المقال: _الإلزام الساخر باللهجة الجزائرية_

وبعد أن يتزوجها على الطريقة المدخلية:

كي تقولو اشريلي قندورة يقوللها: قولي لربيع المدخلي يشريلك.

وكي تقولو قتلتنا بالبصلة بدللنا ولو بشوي طماطم ؟ يقوللها مام البصلة ما نزيدش نجيبها قولي لربيع المدخلي يجيبهالك.

وكي تقولو اديني نحوس شوي يقوللها قولي لربيع المدخلي يبعثلنا حق التحويسة وحوسي بيها وحدك.

وكي تقولو اني عطشت اشريلنا الماء، يقوللها قولي لربيع المدخلي يبعثلك ماء زمزم من هيه.

وكي تقولو كرهت من المعيشة داخل الخيمة بغيت دار لاشتى تاع طوب التراب يقوللها قولي لربيع المدخلي يشوفلك مع ولي الأمر تاعو كشما يعطيك قصر في الرياض.

وكي تقولو الطفل خصو الحليب وليكوش يقوللها قولي لربيع يشريلو

وكي تقولو او كبر وخصو يدخل يقرا يقوللها ماكان لاه يقرا قولي لربيع يقريه.

وكي يلحق الوقت لي يجي ولدو يتزوج وتقولو منين الدراهم باه يتزوج يقوللها وش يدير بالدراهم ؟ يحوس على وحدة مدخلية كيفك باباها كاتب منشور في الفايسبوك يقول فيه (إذا تقدم رجل لابنتك فلا تسأله عن مال ولا نسب بل اسأله عن حبه للشيخ ربيع المدخلي) ويتزوجها كيما تزوجتك وهي ماشية زي الفل.

كتبه #صهيب_بوزيدي