الشيخ القرضاوي: عمر في العلم والدعوة
تعليق لي باللهجة الجزائرية أردت تحويله من تعليق إلى منشور ((بقلم صهيب بوزيدي))
القرضاوي مات وعمره 97 سنة قضى أكثر من 87 سنة منها في العلم حيث حفظ القرآن وعمره 10 سنوات ومع ذلك لم يتعلم التوحيد بالنسبة للمداخلة.
بينما شخص كان بالأمس القريب يسكر بالباطاكس وليسونس مبعد يدير آكسيدون وهو خابط يدخلو القزاز في وجهو تجيه نفحة تاع توبة يحكموه هكاك على السخانة في اليوم اللول لي يدخل فيه للجامع يتخاطفو عليه جماعة يقولولو وش رايك تطلع للجبل (حي على الوذرار) وجماعة يقولولو اولدي اك تباصي، أيا يجيوه المداخلة يقولو ماعليش راك معانا تقدر تدير اللحية والقميص ويعودو العوام يعيطولك وش راك ا الشيخ وتقدر تولي تفتي لكن بشرط تقرا الأصول الثلاثة على يد الأخ لي يبيع القميص في الرّحبة، وتدير فيها حجّة عند فركوس تبات فيها برا في سبيل الله كي تروّح حتى ولو ما قريتش حتى كتاب في حياتك المهم اك وليت تعرف الإخوة والمشايخ وطاعة ولي الأمر...وهكذا راك تعلمت التوحيد.
من بعد يقولولك غلمان أهل السنة يعرفون التوحيد أكثر من كبار رؤوس أهل البدع.
وإلا تبانلك راهم يقراو في التوحيد صح ؟ حتى التوحيد على الطريقة تاعهم ماهمش يقراو فيه المخير فيهم ما يفوتش الأصول الثلاثة أو كتاب التوحيد، زعمة يقراو كتاب الاستغاثة في الرد على البكري لي كتبو ابن تيمية ؟ اي باينة ماكانش منها، معظمهم ماهمش سامعين بالكتاب هذا أصلا، وحتى لي حاطينهم مشايخ إذا طاروا طاروا يسمعوا بالدرر السنية [تاع جماعة الدعوة النجدية لي جاو من بعد محمد بن عبد الوهاب....لي يقرا الكتاب هذا يا يولي دا*عشي يا يراجع حساباتو في هذه الدعوة من جذورها، فيه التكفير بالقرو والديتاي "جملة وتفصيلا"]
المهم، باه تعرف التوحيد عند المدخلي لازم تؤمن بأن ربيع المدخلي هو الرسمي، يعني تقدر تقول توحّد ربيع المدخلي في حمله للواء الجرح والتمهبيل.
أما التوحيد والله لو تسقسي واحد فيهم عرفلي "العبادة" وتقولو نزّلي هذا التعريف على المسائل باه نعرفو وينهي الشرك ووينهي التوحيد يتلفولو الخيوط ويعرف بلي مفهومهم للتوحيد على بعضاهم هزو ولمّو واضربو في الحيط ولوكان نحاسبوهم بمعاييرهم وننحيولهم العذر بالجهل راح تنطبق عليهم هوما شروطهم لي داروها للمسلم تاع [العلم بمعنى لا إله الله] ويظهروا بلي هوما ماهمش فاهمينها لأنو تلقاه يقولك [لا معبود بحق إلا الله] صح لكن لو تسقسيه ما معنى معبود وما معنى العبادة راح يدخل في حيط لأنه لو كان يعرف الجواب لما اتهم جل المسلمين بالشرك والجهل بالتوحيد.
أخيرا: ما بيهم لا توحيد لا والو، الحاصول فكك من التفكير في المقاومة والله لا يجعلك تعرف التوحيد [اعرف ربيع المدخلي مستحيل يتهمك بعدم معرفة التوحيد، واقرا كتب الدنيا كامل في العقيدة وما تستعرفش بربيع المدخلي راح يتهمك بالجهل بالتوحيد].
كتبه #صهيب_بوزيدي